पश्चिमी बजारबाट हुने आगमनमा गिरावट आए पनि चीन र दक्षिण एसियाली मुलुकहरूबाट उल्लेख्य वृद्धि भएपछि सेप्टेम्बर २०२६ मा नेपाल भित्रिने विदेशी पर्यटकको संख्या १२.१ प्रतिशतले बढेर ८८,२४८ पुगेको छ।
रूपन्देहीका स्थानीय व्यवसायीहरूले गौतमबुद्ध अन्तर्राष्ट्रिय विमानस्थलमा नियमित अन्तर्राष्ट्रिय उडान पुनः सञ्चालन गर्न सरकारसँग माग गरेका छन्, जहाँ गत चैतदेखि उडान ठप्प छ।
पाँच वाइडबडी क्याप्टेनको राजीनामा, चुलिँदो ऋणभार, थन्किएका जहाज र सर्वोच्च अदालतको आदेशपछिको नेतृत्वविहीनताका कारण नेपाल वायुसेवा निगम चरम संकटमा परेको छ।
पर्यटन विभागले चालू शरद ऋतु (अटम सिजन) का लागि ६९ देशका ६४८ पर्वतारोहीलाई २० वटा हिमाल आरोहण गर्न अनुमति जारी गरेको छ। यसबाट राज्यलाई करिब २३ करोड ८९ लाख ६० हजार रुपैयाँ रोयल्टी प्राप्त भएको छ। विभागका सूचना अधिकारी सुरज घिमिरेका अनुसार अनुमति पाउनेहरूमा ७१ वटा आरोहण दलका ४८५ पुरुष र १६३ महिला छन्।
दसैँ, तिहार तथा छठ पर्वलाई लक्षित गरी संसदीय समिति र ट्राफिक प्रहरीले काठमाडौँ उपत्यकामा संयुक्त जाँच, भाडा नियन्त्रण तथा यात्रु सहायता कक्ष सञ्चालनमा ल्याएका छन्।
सामुदायिक होमस्टे र गुरुङ हेरिटेज ट्रेलसँगको आबद्धताले लमजुङको क्व्होलासोँथार गाउँपालिकास्थित सिङ्दीमा दिगो ग्रामीण पर्यटन प्रवर्द्धन गर्दै स्थानीयलाई आम्दानीको नयाँ बाटो खोलेको छ।
हिमालय एयरलाइन्सले काठमाडौँ–साङ्घाई सीधा उडान र नेपाल एयरलाइन्सले ताप्लेजुङको सुकेटार विमानस्थलमा पुनः सेवा सञ्चालन गरेसँगै दसैँ तथा पर्यटकीय सिजनअघि महत्वपूर्ण हवाई सम्पर्कहरू जोडिएका छन्।
अविरल मनसुनी वर्षा र जोखिमपूर्ण बाटोका कारण अन्नपूर्ण चक्रिय पदमार्गको पदयात्रा अवरुद्ध भएको छ। यसले गर्दा थोरङ ला भञ्ज्याङ पार गर्ने प्रयास नगरी सयौँ विदेशी पदयात्रीहरू मनाङबाटै यात्रा अधुरै छाडेर फर्किएका छन्। अन्नपूर्ण संरक्षण क्षेत्र आयोजना (एक्याप) धारापानी पोस्टका इन्चार्ज भूपेन्द्र गुरुङका अनुसार सेप्टेम्बर २२ देखि २८ सम्म १५१ पुरुष र ९५ महिला गरी २४६ जना विदेशी पर्यटक लमजुङतर्फ फर्किएका छन्। उक्त पोस्टमा दैनिक १०० भन्दा बढी पदयात्री दर्ता हुने गरेकोमा त्यो सङ्ख्या घटेर जम्मा एक-दुई जनामा झरेको छ।
