बडीमालिकामा भारी हिमपातपछि दुई पदयात्री सम्पर्कविहीन
कञ्चनपुरका दुई युवा भारी हिमपातपछि बाजुराको बडीमालिका क्षेत्रमा सम्पर्कविहीन भएका छन्। प्रहरीले खोजीका लागि टोली पठाउने तयारी गरिरहेको जनाएको छ।
कञ्चनपुरका दुई युवा भारी हिमपातपछि बाजुराको बडीमालिका क्षेत्रमा सम्पर्कविहीन भएका छन्। जिल्ला प्रहरी कार्यालय बाजुराका अनुसार सम्पर्कविहीन हुनेमा बेदकोट नगरपालिका, दैजीका २० वर्षीय मनिष बोहरा र कृष्णपुर नगरपालिका–२ का २१ वर्षीय सागर कार्की छन्।
प्रहरीका अनुसार उनीहरू जिल्ला सदरमुकाम मार्तडीबाट धार्मिक तथा पर्यटकीय स्थल बडीमालिका मन्दिरको दर्शन गर्न निस्किएको पाँच जनाको टोलीमा थिए। टोलीका अन्य तीन जना बडीमालिका पुगेर फर्किसकेका छन्। बोहरा र कार्की भने शनिबार, कात्तिक १४ (अक्टोबर ३१) दिउँसोसम्म सम्पर्कमा आएका छैनन्।
जिल्ला प्रहरी कार्यालयका सूचना अधिकारी प्रहरी निरीक्षक नरेशबहादुर शाहीका अनुसार मन्दिरबाट फर्कने क्रममा शुक्रबार बोहरा सम्पर्कविहीन भएका थिए भने शुक्रबार रातिदेखि कार्कीसँग पनि सम्पर्क हुन सकेको छैन। शुक्रबार फोनमा कुरा हुँदा कार्कीले बडीमालिकाबाट फर्कने क्रममा साथी हराएको र आफू त्रिवेणी पाटनमा रहेको बताएको शाहीले जानकारी दिए। भारी हिमपातका कारण दुवै जना अलपत्र परेको हुन सक्ने र दुवैको मोबाइल बन्द भएको सङ्केत आइरहेको उनले बताए।
शाहीका अनुसार जिल्लामा शुक्रबारदेखि परेको वर्षाले बडीमालिकासहित उच्च हिमाली क्षेत्रमा हिमपात भएकाले उद्धारमा कठिनाइ भएको छ। प्रहरीले दुवैको खोजीका लागि मार्तडीबाट टोली पठाउने तयारी गरिरहेको छ।