काठमाडौंको गेस्ट हाउसबाट १२० ग्राम ब्राउन सुगरसहित दुई जना पक्राउ

सशस्त्र प्रहरी बलले गएराति काठमाडौंको एक गेस्ट हाउसबाट १२० ग्राम ब्राउन सुगरसहित दुई जनालाई पक्राउ गरेको प्रहरीले मंगलबार (कात्तिक १०, अक्टोबर २७) जनाएको छ। अनलाइनखबर, लोकपथ र नेपाल खबरले यो समाचार दिएका छन्।

एपीएफ इन्टेलिजेन्स ब्युरोको टोलीले सूचनाका आधारमा काठमाडौं महानगरपालिका-३२ स्थित विश्राम गेस्ट हाउसको कोठा नम्बर ६ बाट पाँचथरको फालेलुङ-५ घर भएका ४२ वर्षीय सुन्दर राई र ४२ वर्षीया रविना राईलाई नियन्त्रणमा लिएको सशस्त्र प्रहरी बलका डीएसपी शैलेन्द्र थापाले जानकारी दिए। उनका अनुसार उनीहरू ब्राउन सुगर बेचबिखन गरिरहेको अवस्थामा पक्राउ परेका हुन्।

प्रहरीले ब्राउन सुगरसँगै दुई थान मोबाइल र ४ हजार ५५० रुपैयाँ नगद बरामद गरेको छ। बरामद सामग्रीसहित दुवैलाई आवश्यक अनुसन्धानका लागि सम्बन्धित निकायमा बुझाइएको थापाले बताए।