शेख हसिनाको बंगलादेश फर्किने योजना

बंगलादेशकी पूर्वप्रधानमन्त्री शेख हसिनाले 'द एसोसिएटेड प्रेस' (एपी) लाई सन् २०२५ मा विशेष न्यायाधिकरणले सुनाएको मृत्युदण्डको सजायका बाबजुद यसै डिसेम्बरमा बंगलादेश फर्कने बताएकी छिन्। सन् २०२४ मा विद्यार्थी नेतृत्वको आन्दोलनबाट सत्ताच्युत भएपछि भारतमा बस्दै आएकी हसिनाले स्वदेश फर्किँदा आफू पक्राउ, कारावास, यातना वा हत्याको जोखिममा पर्न सक्ने कुरा थाहा रहेको बताएकी छिन्। न्यायाधिकरणले प्रदर्शनकारीमाथि भएको दमनका सम्बन्धमा उनलाई मानवता विरुद्धको अपराधमा सजाय सुनाएको थियो; संयुक्त राष्ट्रसंघको एक प्रतिवेदनले सो दमनमा करिब १,४०० जनाको मृत्यु भएको उल्लेख गरेको छ। हसिनाले कुनै गल्ती गरेको अस्वीकार गर्दै फैसला मान्न इन्कार गरेकी छिन् र मुद्दाको वैधतामाथि प्रश्न उठाएकी छिन्।

फेब्रुअरीको निर्वाचनमा तारिक रहमान ठूलो जितका साथ सत्तामा पुगे; उक्त निर्वाचनमा हसिनाको अवामी लिगलाई भाग लिन रोक लगाइएको थियो र पार्टी अहिले पनि प्रतिबन्धित छ। एपीले कात्तिक १८ गते (नोभेम्बर ४) जवाफ पाएको उक्त अन्तर्वार्तामा हसिनाले सन् २०२४ को अगस्टदेखि आफ्नो पार्टीका कम्तीमा २०,००० सदस्य मारिएको र थप हजारौं पक्राउ परेको, यातना दिइएको वा लुकेर बस्न बाध्य पारिएको आरोप लगाएकी छिन्, साथै अधिकारीहरूले पार्टीलाई व्यवस्थित रूपमा दमन गरिरहेको दाबी गरेकी छिन्। सरकारले पक्राउका घटनामा विशिष्ट आरोप रहेको बताउँदै आएको छ भने एपीले प्रतिक्रिया मागेकोमा प्रधानमन्त्री कार्यालयको प्रेस विङले जवाफ दिएन। हसिनाले कट्टरपन्थी तत्त्वको बढ्दो प्रभावप्रति पनि चिन्ता व्यक्त गरेकी छिन्। बंगलादेशले पटक-पटक सुपुर्दगी मागे पनि भारतले उनलाई हस्तान्तरण गरेको छैन।