संघीय स्वास्थ्य तथा खाद्य स्वच्छता मन्त्री निशा मेहताले मंगलबार (मंसिर १) जनकपुरमा मधेस प्रदेश सरकारअन्तर्गतका स्वास्थ्य निकायको अनुगमन गरिन्। मुजेलियास्थित मधेस स्वास्थ्य आपूर्ति व्यवस्थापन केन्द्रको स्टोरमा औषधि राख्ने फ्रिजभित्र ह्वीलचेयर भेटेपछि उनले प्रदेशका स्वास्थ्य सचिवलाई हपारेको अन्नपूर्ण पोस्ट र देशसञ्चारले जनाएका छन्। यी दुई सञ्चारमाध्यमका अनुसार मन्त्री मेहता र सांसद राजकिशोर महतोसहितको टोलीले मधेस स्वास्थ्य विज्ञान प्रतिष्ठानलाई एक महिनाभित्र सरसफाइ गरी सेवा चुस्तदुरुस्त बनाउन निर्देशन दिएको छ।
प्रतिष्ठानका रजिस्ट्रारले २०० शय्याको स्वीकृति प्राप्त प्रादेशिक अस्पतालमा ५०० शय्यासम्मका बिरामीको उपचार गर्नुपर्ने बाध्यता रहेको मन्त्रीलाई जानकारी गराए। अस्पतालमा मिर्गौला र क्यान्सर उपचार केन्द्रमार्फत विशेषज्ञ सेवा सञ्चालन गर्ने तयारी भइरहेको मन्त्री मेहताले बताएको उक्त दुई सञ्चारमाध्यमले जनाएका छन्।